| اشعار عامية على سلامة | |
|
|
|
كاتب الموضوع | رسالة |
---|
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:38 pm | |
| كلام سخيف
زهقت من قولة دي بنت بألف راجل أنا عايزة أحس إني معاك مخلوق ضعيف وإني فعلا بنتمي لجنسي اللطيف إحميني من حزني ومن إحساس مخيف طول النهار مكشرة وواخداها جد ولمه شعري علي ورا ومش شايفة حد والدنيا حر موت وأنا مليانة برد وكل ده عشان يادوب أعدي الرصيف ماعدش ف الشارع شجر بيرمي ضل وكل يوم حاجات تضيع وحاجات تقل وأنا خلاص ماعرفش ليه بقيت أمل واعذرني لو كان الكلام مر وسخيف | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:38 pm | |
| حاجات بسيطة
كلها حاجات بسيطة
وأد إيه بتفرق معايا
أد إيه..
زي إيه..؟
زي لما الفرحة تيجي لوحدها
زي إحساس بالرضا
وزي ما حبك كده
وزي دمعة طيبة
أرتاح بعدها
وماعرفش ليه..
وزي إيه..
زي وردة ف عيد ميلادي
وزي يوم بسيط وعادي
عدي لكن مانستهوش..
وكلمة حلوة سمعتها
من قلب حد ماعرفهوش..
زي ما فضفض معاك
بكلمتين..
وف وسطهم أسرح
تقوللي روحت فين..
وزي إحساس بالأمان
لما ليلة أبات ف حضن
أصغر ولادي..
وزي غنوة من بعيد
فيها من ريحة بلادي
كلها حاجات بسيطة
وأد إيه بتفرق معايا..
أد إيه.. | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:39 pm | |
| لب وسوداني
بقول لها..
ما تيجي نهزر
نجري ونلعب
ونكسر كل الحاجات..
ونجيب م اللي فات..
يومين حلوين...
قالتلي والنبي إنت فايق ورايق..
قولتلها طب وليه نتضايق..
إحنا لسه صغيرين..
وأكبر عيالنا..
يا دوب تسع سنين..
يعني لو بنحكم مصر..
تبقي يا دوب لفة ونص..
مش عشرين..
- وطي صوتك البت بتذاكر..
والواد ماصدقت إنه نام...
إنما إيه اللي صحي ف قلبك..
من تاني الغرام..
قولتلها جوايا كلمتين غزل..
قالتلي والنبي إنت عسل..
بس هي الظروف..
- مالها الظروف..
فاكرة لما كنتي
بتحوشي من المصروف..
جبتيلي ورد ف عيد ميلادي..
- وجبتلك بلوفر صوف..
- وجبتليلي بلوفر صوف..
- فاكر لما بوستني
وإحنا لسه مخطوبين وأبويا لاحظ
يالهوي كنت هموت م الكسوف..
- فاكرة أول مرة قلت لك بحبك
وشك احمرّ
- إنت اللي وشك كان مخطوف..
- مش إنتي كنتي بترسمي زمان..
- وإنت كمان كنت بتكتب شعر..
- هو احنا بطلنا نحس..
- إحنا بطلنا نشوف..
وطلعنا اللب والسوداني..
وفتحنا التليفزيون..
وسكتنا تاني..
ولازال السبب..
غير معروف..
غير معروف | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:39 pm | |
| سلطانية زبادي
السحور فول.. والزبادي طازة.. وف سلطانية فخار.. ومسحراتي.. ع القلب دق.. من غير لا رق.. ولا طار.. يا تري العشق نصيب واللا اختيار.. أنا اللي حبيتك.. من قبل البلاستيك.. ما يبقي علب.. وقلوب وبيوت وأزهار.. عايزين يبيعوا بيت أبويا.. ويشغلوني سمسار.. تصدقي.. أنا بجد مستغرب أوي.. محتار.. إزاي بتقدري تسمعي صوت الأدان.. ويا تري لسه بتفرحي.. لما تتفرجي ع المسلسلات.. والناس بتقول تحيا مصر.. يسقط الاستعمار.. واللا دلوقتي بتفضلي أفلام الكرتون ومغامرات القط والفار.. | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:41 pm | |
| أنا المواطن نقط
أنا المواطن نقط نقط نقط
ولا بتهان وأسكت زى زمان
أنا بصرخ وأكتب وأبعت وأتكلم
وأسمع بقى يا معلم
أنا المواطن نقط نقط نقط
رقم قومى نقط نقط نقطمحل الأقامة نقط نقط نقط
بجوار البنزينة
بصراحة حرام تعملوا فينا نقط نقط نقط
وتطلعوا نقط ونقط أهالينا
عملتوا انتخابات وكلها نقط نقط نقط
وشيلتوا وحطيتوا حاجات نقط نقط نقط
بصراحة أنا بقيت قدام مراتىحاسس انى مش نقط خالص
وأقولها نفسى أبقى نقط بجد
تقولى يا اخويا ماتحرقش دمك
محدش بينفع حد
حسك ف الدنيابكرة تبقى نقط نقط نقط ....!!! | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:42 pm | |
| أحب العسل
احب العسل
واموت فى الكسل
ووقت الازمه اقول فى العشق
حكمه ومثل
وبس خلاص ..
اهجص الاقى ميت مليون هجاص
افكر...... هس.... ولا صوت ولا ناس
لأنى كده ثقافة وعلم
يدوب فى الفيلم فى الكراس
وراسى زى اكبر راس
مفيش احلام مفيش احساس | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:42 pm | |
| وأحنا لسة في إبتدائي
وإحنا لسه في إبتدائي
وسط اوراقى القديمة
اللى لسه منها باقي
شوفت صورتى بين زميلى
و احنا لسه فى إبتدائي
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقي
هو صاحبى
لما كان فى الدنيا صاحب
اما دول كانوا جيرانى
كل واحد فينا حقق
جزء من بعض الأمانى
أما دى الشاطرة البليدة
العنيدة أم الضفاير
تبقى حبى الأولانى
أد ايه حزنت عليها
لما راحت فصل تانى
ما احنا كنا تختة واحدة
فى تانية تالت
مره قلت
و هى قالت
لما مدت ايدها شالت
دمعة وقعت غصب عنى
جوه كراسة الحساب
كنا لسه صفحة بيضة فى الكتاب
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقى
واحنا لسه فى أبتدائي | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:43 pm | |
| ميـــــــدان الجــيـــزة
ضيعت شوية سنين كده
بحب من بعيد لبعيد
والحكاية مقضياني
ومبسوط وراضي وسعيد
أفرح بأي حاجة
وأستني هدوم العيد
و بعدين ضيعت شوية سنين
نفسي أبقي أشطر واحد في الكيميا
مع إني مش فاهم ميدان الجيزة
والحياة رغم قسوتها
شايفها لذيذة
وضيعت شوية سنين بقي
نفسي أعدي أختبارات الكورة
في النادي الأهلي
وأشتغل في وكالة ناسا
وأبقي واحد م العلماء المهمين
و بعدين ضيعت شوية سنين
منتهي أملي كرسي فاضي
في أتوبيس تلات خمسات
عين الصيرة أم المصريين
وضيعت شوية سنين
عايز أفهم الفرق
بين النكسة والهزيمة
والأحترام وقلة القيمة
و أبقي نجم سيما
م المشهورين
وبعدين ضيعت شوية سنين
واقف عند نظرية المؤامرة
لا عارف أعيش ف الزمالك
ولا راضي أعيش ف غمرة
ومش عارف ليه
الحشيش ممنوع
مدام مصرحين بالخمرة
وياتري بقي أتجوز
واحدة بيضة ولا سمرة
ولا أسأل فيها
رجال الفتوي والدين
وضيعت شوية سنين
مركز ف السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
قشر الموزة
وضيعت شوية سنين
لا انا بحر ولا نيل
حاجة كده بعيد عنك
ملهاش عوزة
ولما بقيت كام وخمسين
لقيتني لسة
بحب من بعيد لبعيد
وبرضة مش فاهم
ميدان الجيزة | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:43 pm | |
| أسكـــــت يــــــاض
قولي يا عبد الجواد
مش إحنا الشعب
وده مثبوت في البطاقة
ومكتوب ف شهادة الميلاد
ولا مصر خلفت ولاد غير الولاد
طيب ليه
كل ما اتكلم واستخدم حقي
يقولولي اسكت ياض
سنين ساكنين
في نفس الحتة الضيقة
نفس الهوا
ونفس الدوا
ونفس الأمراض
على فكرة
مفيش جبنة في التلاجة
ولا خيار
ولا أعياد
مفيش غير فيلم قديم
كل شوية بيتعاد | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:44 pm | |
| مخدتش ولا أديت
لما وشي باة أصفر لمونة
مخدتش ولا أديت
ولما أترميت ف قلب الطاحونة
مخدتش ولا أديت
ولما شميت ريحة شياط
ووقعت فوق دماغي كل الحاجات
مخدتش ولا أديت ..
ولما قالولي من أيه الدم اللي ف وشك
فين روحك
حاسب قلبك بيغشك
مخدتش ولا أديت
ولما حسيت بألم ف راسي
ولقيتني ناسي ..
اسم ابني الوحيد ..
ولما شوفتك رايحة لحتة بعيد
مخدتش ولا أديت..
لحد ما لقيتني مربوط في جبس
وشاش ..
وشايف كل شيء طشاش ..
وحواليا ناس كتير معرفهاش
بيقولولي مين اللي رماك م القطر
يا صابر .... | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:44 pm | |
| اسمه ايه ده ..؟!!
بالصلاة ع النبي
احنا عندنا اسمه ايه ده
أحسن واحد يحلل مباريات
يحط التشكيل
الأساسي والبديل
ويقولك إمتى تلعب براسين حربة
وإمتى تلعب من غير راس
ولو ضميرك مش مرتاح
وعندك إحساس
بلاش تشوط ع التلات خشبات
وعندنا اسمه ايه ده
أحسن مهندس خبير
بيرمش بس للبير
يطلع غاز وبترول
وينزل دهب م الحنفيات
وعندنا اسمه ايه ده
أحسن سمكري ف التلاتين سنة
الأخيرة
تخش من مجرى العيون
على عين الصيرة
هتعرفه من مناخيره
ومن شكل العربيات
وعندنا اسمه ايه ده
مجرم قانون دولي ودستور
وإيده خفيفة أوي
في التعديلات
يشيل من هنا
ويحط هنا
جواهرجي يا ربي
مُلقاط
وعندنا اسمه ايه ده
أحسن واحد يحط الفول عالطعمية
ويعمل سندوتشات
وعندنا اسمه ايه ده
أحسن دكتور
مسالك وعظام وقلب وغرام
من نظرة عينك يعرف
كل الحاجات
ولا روشتة ولا إبرة ولا تحليل
ولا إشاعات
وعندنا اسمه ايه ده
أحسن حانوتي آثار
والله لو جاله برد
أبو الهول يموت
وتنتحر الأهرامات
وعندنا اسمه ايه ده
أحسن كاتب
وأحسن مخرج رقص
وأحسن جزار كوارع وعكاوي
وحلويات
وعندنا اسمه ايه ده
ملوش حل ف الزراعة
فواكه وحبوب وخضروات
يقول للأرض قمح
تقوله حاضر
ونخبز ونعمل بسكويت
وفينو بسمسم وبقصمات
وعندنا اسمه ايه ده
صاحب القهوة
كلنا نتيتم ونتشرد
لو بعد الشر
زي الناس ما بتموت
مات
يا أخي انا مش عارف ..
لما أحنا عندنا
اسمه ايه ده
واسمه ايه ده
أمال اسمها ايه دي
مصر ..
مبتتقدمش ليه
وتعبت ..
وزهقت ..
وداخت ..
ولفت السبع لفات | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:45 pm | |
| الغـــــم النبيــــــل
مش أنا امبارح
رحت من بيتنا في السيدة
للشغل في حلون
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
والحمد لله
على كل شيء | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:46 pm | |
| اللهم أجعله خيــــــر
نفسي أتمطع أنزل .. اطلع أحلق أقرع وأتشجع وأقلع كل هدومي القديمة وأرمي الحاجات اللئيمة وأبقى حر كده زي الطير نفسي أضحك من قلبي من غير ما أخاف وأقول اللهم أجعله خير يا أخي نفسي مرة أغير خط السير يعني مش زي ما روحت لازم أرجع نفسي أفرح بضحكتك من غير ما أخطفها منك أو أحسدك أو أطمع نفسي أبص م الشباك براحتي وأقول ياه الله يا بختي نفسي أحس من تاني بالجمال يا سبحان من أبدع نفسي يبقى لية لازمة ف وقت الحزن .. والأزمة تلاقيني ببني بصلح بغير بحلم يعني أنفع نفسي ده يحصل قبل كل شيء جوايا .. ما يعجز أو يودع نفسي أحب من تاني .. النهار والعمار يعني بأختصار نفسي أرجع تاني بني أدم تفتكر ده ممكن ..؟؟؟؟ وأنا ولا بشوف .. ولا بسمع | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:46 pm | |
| الـــــواد ابني
الواد ابنى ابو لسان طويل
قالى
يعنى سافرت يا بابا واتغربت
مشوار طويل
وف الاخر راجع
ف شارع متفرع من شارع
وشقة فى الدور الرابع
ودولار نازل طالع
وشوية حاجات
دكان مستنى الترخيص
ومكنسة على خلاط
وكمبيوتر مش نافع
من الاخر معرفتش تتصرف
مقدرتش تقول
لاء
مش مسافر
منين الكحة دى يا بابا
دى عمر
ولابرد
ولا سجاير
انت عارف يا بابا انا بقالى اد ايه بستناك؟؟
ايه يا بابا
انت هتعيط
ده انا كنت بهزر معاك
كنت بهزر معاك | |
|
| |
احمدشعبان رجب المراقب العام
اعلام الدول : عدد المساهمات : 7949 تاريخ التسجيل : 17/04/2010 العمر : 64
| موضوع: رد: اشعار عامية على سلامة الثلاثاء 20 أبريل 2010, 6:48 pm | |
| الشعر عيرة والكحل عيرة والورد فوق الخد ولحد الضفيرة عيرة الصبر عيرة والضحك عيرة والفرح والأحزان كمان وحاجات كتيرة حتى الحنان جوه البيوت حتى الكلام...حتي السكوت حتى الهتاف جوه المسيرة برضه عيرة حيرني حيرة بقينا ليه حبة حاجات قمصان بدل على بالونات ما بقيتش شايف إيه اللي جاي وإيه اللي فات ما بقيتش افرق ده أزرق ده ولا أحمر رمادي ودي كارثة ولا ده وضع عادي وده طفل ولا راجل عجوز وده إيه ده راخر جايز يجوز نعسان ده ولا ساكت وساير بردان ده ولا ده دور وداير وده إحنا ولا الكل حاير | |
|
| |
محمد حموده منشاوى
اعلام الدول : عدد المساهمات : 107 تاريخ التسجيل : 11/03/2010 العمر : 60
| موضوع: رد: اشعار عامية على سلامة الإثنين 11 يوليو 2011, 11:24 am | |
| شكرااااااااااااااااااااااااااااااااااا | |
|
| |
| اشعار عامية على سلامة | |
|