اشعار عامية على سلامة

الفاتَحة عٍِ الأموات

وفضلت أسَِتنى أستّنى…


لَحدّ ما عََدّى اخر قطر وفَات…

حَزنت قَعّدت أعيط أعيّط…

قلت أتمشى أتسلّى…

أتفرج عَ الشّوارع والنّاس والعربيّات…

زهقت…

قُلت أرتاح…

سنَدت عَلَى روُحى…

إتلخبَطتّ جُوّايا كلّ الحَاجَات..

مدّيت إيدى ف جيوُبُى…

لقيت شُوّية وَرَق قديم…

وصَوُر وكرُوت تليفونات….

قُلت أكلم مرَاتى…

افتكرت إنها خدت الدّوا…

ونَاَمت من تلات ساعات….

قُلت أكلم أخُويا….

افتكرت إنه طلعِ مَعَاش مُبكّر…

وكَاَره تاريخُه…

ومركّز ف التّأمينات..

أكلم أُختى…

هاتعيد وتقول نفس الحكَايات…

أكلم خَالىِ….

يكُونْ ف عِلْمَكْ…

أنا مُتواضَعْ جِداً….

وِمشْ طالبْ كتيرْ….

يَعنى شَقَة صُغيِرةْ…

ف الكيِِِِِِِِِِِِِِِلُو تِسعينْ…

مَا هى الحَياة مَشَاوِيرْ….

مِشِ شرْط بَقى بتطلْ…

عَلَى جَناين وهَوا وعَصافيرْ…

حَظّك اليُومْ…

زَىّ إمْبارحْ…

زَىّ كُل يُومْ…

ومَفيشْ حَاجةَ متْغيّرةْ…

الْبت الطّويلَة عَايزَاكْ…

بَسَ إنت عَيَنكْ ع الْقُصيرةْ…

يَا لَئيمْ…

بَسّ إبن حَلاَل وطيّب…

وتِستاهل كُل خير…

وحِتّة سُكّرة…

شُوف…

الزَّهْرة مع الْمرّيخْ وعَطَاردْ…

وشْويّة كَوَاكب كَدهْ…

عامَلين معاك شُغل…

آخرْ مسْخَرَةْ…

تطْلَعْ منْ إنتخَاباتْ…

عَلَى استفْتَاءاتْ…

وَحَاجَاتْ ومحْتاجَات…

وبيعْ وسَمسَرةَْ…

وإنتَ ماَشَاء الله عليِك…

غَزَالْ يا رَبّى…

لاَ هَمّك إشاراتْ…

ولاَ مْطّباتْ…

أقولك حكاية…

يمِكن مَتصدقهاش…

النور قاطع ف شارعنا…

من سنين ولسّه مجاش…

عارف ليه…

آه والعيش والملح…

زى ما بقولك كده…

ودوَّرنا كتير مخلَّيناش…

وملقيناش…

غير سلك عريان مكشوف…

واقف ف العتمة مكسوف…

لو موصوفلك


لو موصوفلك ترجع…..جوة الهيصة

وعيش

لو موصوفلك ترجع….روح ويارايت

متجيش

لو موصوفلك تضحك……اضحك

على أحزانك

لو موصوفلك تعشق…حب واقف فى

مكانك

لو تختار فى زمانك……..أحسن

الضَرَيبة

مش غريبة ..
ندفع الأوجاع ضريبة ..
قَسَّمى الأحزان شرايح ..
عبَّى دمعى ف الصفايح ..
واسألى عمرى اللى رايح ..
المصيبة
لسة شايلك فى العيون أجمل حبيبة ..
قولى كذبة ..
حُبى ليكى يبقى حسبة ..
والأمانى والهوا ..
والشوق بنسبة ..
وإنتى عزبة ..
للى مالُه فيكى حِسبة ..
المُصيبة ..
لِسة شايلك فى العيون ..
أجمل حبيبة ..
مين اللى قرر ..
يقتل الحلم .. فى عيون كُل الطيور ..
ليه تسلَّمينى ..
من طابور .. تانى لطابور ..
قَيَدّى البخور ..
بركات جراحنا المزمنة ..
كل الأمانى الممكنة ..
تبقى يادوبك دمعتين ..
فوق صورة باهتة ملونة ..
سايبة الجراح ليه تهدنى ..
إيه فيكى تانى يشدنى ..
ده أنا اللى حُبى عززك ..
وإنتى اللى عشقك ذلَّنى ..
لسه ياهبلة بتسألى ..
بتحبنى ..
نفسى اشترى ..
شبرين فى حضنك وارتوى ..
فكرك مسافر أغتنى ..
خدى اللى حيلتى ..
الهدمتين والقرشينات ..
بس استُرى عرض البنات ..
لو حسينا على دمنا ..فى قلوبنا مات ..
لو بكرة فات ..
وإحنا بياكلنا السُكات ..
كُل الأمانى الممكنة ..
تبقى يادوبك دمعتين ..
فوق صورة باهتة ملونة ..

ناقص حته

....وكل ما أوزن

......ألاقي لسه

ناقص لي حته

أحط حته

تقل حته

وأجيب قميص

تضيع ?اكته

وأعيش لي ساعة

يفوتني سته

وكل ما أوزن

ألاقي ناقص

أقول بناقص

لو هي حته

أتاري لسه

ولسه تاخد

سنين وحته

وحاجات تسيبني

وحاجات تاخدني

لحاجات تخبط

في كل حته

....وأقول ها نفرح

..ف يوم

..ها نفرح

ويوم مانفرح

علي الله





...يفضل في القلب حته

على باب سفارة كندا.. لمحت ابليس و ف ايده استماره..


بقول له على فين.. قاللي بص .. يا هجره يا اعاره..


يا عم زهقت.. كفرت .. الاقيش معاك سيجاره..


انا انتهيت خلاص .. لا نافع وسواس ولا خناس


ولا ليا عيش وسط الناس..


دي عالم مجرمين.. عندكوا فائض ف الفساد..


في كل البلاد..


ومش محتاجين شياطين .. مليش عيش ف دي البلاد..


....




بقالي سنين عاطل .


و انتوا بتعرفوا تقلبوا الحق باطل..


و تسلكوا القاتل .. و تمشوا ف جنازة المقتول..


ومفيش مشاكل..




يا عم ده انا بقيت أوسوس بالمقلوب..


و أقول للحرامي .. كفايه بقى .. توووووب..


انت ايه . لوحدك هاتعمل كل الذنوب..


و أنا ابليس أشتغل واعظ .. ولا كمساري ف اتوبيس..




يا عم ده انا زمان


كنت استنى حد ينسى يسمي وهو بياكل لقمته..


دلوقتي كل اكلكم ملوث .. و بصراحه الواحد خايف على صحته..


ده مفيش ضمير اساساً عشان اموته..


و كل واحد بمزاجه .. خربانه ذمته..




يا عم ده كل حاجه اتسرقت..


وكده الاجيال الجديده م الحراميه اتظلمت..


يا راجل ده من كتر ما لطشت معايا..


خرجت ف مظاهره مع الناس اللي بتقول كفايه..


و برضه ......... مفيش فايده.

قلبى الوحيد
اللى من يوم ما اتولدت
ما خدش ولا يوم إجازة..
شغال..
سنين سفر.. ترحال
شال همومى عن رضا..
لا يوم كشر ف وشى
ولا قاللى ليه عملت كده..
وف عز انشغالى
فكرنى بهدوم العيد
واشترى بدالى لعب للعيال
اتحمل غبائى
وسوء اختيارى
وطيشى
وأحزانى
راح معايا الفرح
ومشينا سوا ورا ميت جنازة..
ودقنا طعم المر
والفرح وهو طازة..
عرفنى سكة الأصحاب
وفتح أحضانى للأحباب
وعلمنى إن الستر
مش لقمة
وأربع حيطان وباب
ولو ف يوم
كان فيه ما بنّا عتاب
يميل علىّ وبرقة
يوشوشنى
ويدّلنى ع الحق..
ياه..
بحبك يا قلبى
أرجوك
إوعى تبطل دق..

بوابة تفتيش.....
------------------
بوابة تفتيش على بابك....
كل ما أحاول أعدي تزمر....
و بتتشرط....
و بتتأمر...
أرجع أدور تاني و أدور...
وكل ما أعدي برضه تزمر....
طب آدي الساعه....
و آدي حزامي...
و آدي بطاقتي...
و النضارة...
و آدي عنواني....
و كل حكايتي..
و آدي أمارة...
حتى الفكه الباقيه ف جيبي...
والاشعار...
و المحفظه مفيهاش غير صورتك..
ليل و نهار..
كل هدومي..
زي ما نازل من بطن أمي..
من غير حتى ورقة توت..
و كل ما فوت..
البوابه برضك بتزمر..
و لما لمحني..
واحد طيب م الحراس..
و قاللي اسمعني يا ابن الناس..
إرمي الحته الحلوه ف قلبك..
و عدي..
و البوابه عمرها..
ما تزمر..

ختم دخول ...

مش معقول ....
بيني وبينك ....
ختم دخول ... مش معقول ..
ودول ظباط .. وعساكر ..
ولا حبايب ...
أنا مش فاكر ...
أنا مش غايب ...
أنا مش سايب ...
ولا فتفوتة ...
كبر الواد ....
صوته إخشن ....
بس البنت .. تملي أحن ...
أنا ها اتجن ....
إيه الحدوتة …
لسه جمارك ...
لسه ها ندخل تاني معارك ...
ده انا مش مالك ....
غير اشواق ...
الله يلعن ...
أي فراق ....
بيني .. وبينك
ختم دخول .....
مش معقول .....

ساعات كده بعيد عنك
يجيلي كرشة نفس
وألم ف المعدة
ودربكة ومغص
وساعات أحس
إني شوية أمراض
محطوطة ف قفص
بس ماشي الحال
وساعات من غير سبب
أجري ع الحمام
ويجيلي برد وزكام
وساعات أسهر
وساعات م العصر أنام
وساعات ألاقي
صعوبة ف الكلام
وده تقريباً طول السنة
وساعات أحس
إني مش أنا
بس زي الجن
فاكر اسمي واسم مراتي
وأسامي العيال
وعلي طول بقي
جسمي مكسر ومهدود
صحيح باكل وأشرب
واضحك والعب
بس مش موجود
ومعرفش ليه عيني بترف
عمال علي بطال

بقول لهم
مين اللي بيعيط بحرقة دة؟
قالوا لي
مواطن اتصور وهو بينضرب
قلت لهم
ومين الأمور اللي بيضحك دة؟
قالوا لي
دة واحد عمل شوية كوارث وهرب
قلت لهم
والدنيا عتمة هناك كدة ليه؟
قالوا لي
دي حتة جديدة بتتخرب
قلت لهم
ومين الحاوي اللي بيتكلم دة؟
قالوا لي دة الوضع بيتقلب
وايه الهيصة اللي في الساحل الشمالي دي؟
قالوا لي
دي البقرة بتتحلب
قلت لهم وانتوا قلقلين كدة ليه؟
قالوا لي اصل بنلاعب الكاميرون
وخايفين نتغلب

خد وادى معايا

خد وادى معايا
وقولى كلام غير اى كلام
ولا الدنيا خلاص والناس بطلوا حب واحلام
طب أقولك
أحكيلى حدوتة لحد ما أنام
والعبلى فى شعرى
بقاله سنين مشدود ع البكر
فى بطاقتى الشخصية
مثبوت أن أنا أنثى وأنك دكر
الميه الرايقه بقالها سنين وملاها العكر
كان صيف وشتا وخريف ومطر
جرب تعزف
يمكن لسه جوايا حاجات
دور جوايا تلاقى حاجات وحاجات وحاجات
ضحك لفوانيس
وعروسة وعريس
ودلع ومياصة ولقم بنات
محتاجه لحزن وفرح ودمع ساعات
جرب تعزف
يمكن لسه جوانا نغم وعجب ودهب
وسامحنى
سامحنى ان كنت صريحة معاك الفجر وجب
شايفاك فى عيونك نار وغضب
سامعاك بتقول
ودى مين رباها بنت الكلب قليلة الأدب

الشعر عيرة


الشعر عيرة والكحل عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة

حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة

بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز

نعسان ده ولا ساكت وساير
بردان ده ولا ده دور وداير
وده إحنا ولا الكل حاير

حالة كده

معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا ولا في الكلام ولا عارف أنام
ولا حتى بسأل إيه ده إيه و أخرتها إيه و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني في ألم
أو يستلفلي من لئيم حبّة أمل
حالة كده .. معرفش إيه

حالة كده ملهاش معالم
ساعات تزورني في الربيع .. في الحر .. و في عز الشتا
و تجيب حاجات لا فيها روح ولا ميتة
لكني برجع منّها بعد السكات .. فاهم شوية في اللي فات
حاسس أوي بحزن الصحاب .. محظوظ أنا
ساعات أشاور ينفتحلي ألف باب
لكنّي بغلط في الحساب
معرفش ليه

خربوها

الأوله آه ....
والتانية … آه
والتالتة ... مفيش
معنديش …
نفس أقول آه ...
معنديش …
قالو ..
إقلعوا … قلعنا
ومفيش ... بتعكوا
وبتعنا …
وصار متاعهم .. متاعنا ..
وألف مرة إتلسعنا ...
و برضك ... مفيش
الأوله …آه
والتانية .. آه
والتالتة ... مفيش ....
قالو إبصموا ...
بصمنا …
ده بكره ... سكر .. وسمنا
سيبنا غيرنا رسمنا
إتقسمنا …
على اد ما فينا من جراح ...
ابتسمنا …
الأولة .. والتانية .. والتالتة
مفيش …
الدنيا هاصت .. وهيصنا ..
ريحنا لما .. تيسنا
تاه الطريق من اتوبيسنا
يئسنا …
لا ... عرفنا ليه قلعنا ...
ولا عرفنا ...
إيه … ليبسنا ...
الأوله والتانية والتالتة مفيش
واهى .. ماشيه تجرى المسائل ..
ولا حد ... سائل ...تصحى مرسى ... ينام وائل
ده انا كنت واد م الأوائل ...
وكنت شاطر ... شطارة ...
وكنت فن .. وعمارة ..
وكنت صاحب تجارة ...
معرفش إيه اللى صابنى ...
فى قلبى ... ضاعت
سمارة ….
خربوها …..
خربوها ولاد ….القطقوطة
لا طرحت باميه ... ولا قوطه
وسابوها فى سرير مربوطه ..
و يا ريتهم طلعم رجاله ...
و يا ريتها .. رايقه .. و مبسوطه ..
خربوها …
دول سرقوا الهوا ... والضى ...
ويا عينى ... عليها بلد ...
يا ريتها ... ما قالت أى ..
ويا ريتها ما جابت ولد ..
خربوها …
دول سرقوا النخلتين .. والنهر
والمدرسة ..
والهندسة .. والجبر
سرقوا الشوارع ... والمعانى
والأغانى …
وسيد درويش .. والريحانى ..
سرقوا ... المشاعر .. والمزاهر
والبخور ...
سرقوا الحزن ...
سرقوا …حتى القبور ...
خربوها …
دول سرقوا الطيب .. والزين
وسرقوا …الكحل من العين
وسابوها .. تاكل بالدين ...
وان يوم أتعدلت ... عواجوها ..
خربوها …ولاد ال ..
خربوها ...
خربوها ولاد
الشر ....................................

إستراحة ع الصحراوي …

الجو نار ...
والرطوبة ..
طوبة ...
ملزوقة ف قفايا ..
سايق …
و محدش معايا ...
غيري أنا ...
والذكريات ..
وحبة حاجات ..
إزازة الميه ..
ونظرة عينيا ...
اللي شايفها ...
في المرايا ...
بتبص لي ..
من وقت للتاني بغباء ..
كأنها عارفة الحكاية ..
أو واخدة بالها ...
م الطريق ....
مر السفر ....
من غير صديق ...
أول شمال ...
إرجع ولف ...
الغنوة سكتت ...
و الشريط ....
عمال يسف ..
وإزاي تخف ...
يا ألم من غير جراحة ..
آدي استراحة ...
دماغي محتاجة الصراحة ...
وقلبي محتاج الحنان ...
إركن هنا ....
اشرب ياعم قهوتك ..
ويالا عشان ...
نلحق مكان ..
قبل الغروب ..
وإوعي الردار يسحب ..
ف لحظة غنوتك ...
معدش فاضل ....
في الطريق ....
ولا إستراحة .......

جتك القرف

على حد علمي ..احنا واسرائيل حبايب..

فيه سلام ومفيش حرب ...

طب الظباط والعساكر دول بيعملوا ايه في ميدان طلعت حرب ...!!

ده بنت وولد نازلين يشوفوا بلوزة تليق على ايشارب ..!!

بيحلموا وبيغنوا ..اجمل ما في غناهم انه طالع من القلب ..

من امتى العشق كان بيموت من الخوف ..

ومن امتى الحلم كان بيخاف من الضرب ..

يا كابتن يا باشا خليك ابن بلد ..

هوه انت معندكشي اخوات .. صبيان ولا بنات ؟؟!!

يعني انتو كل عليتكو ظباط ..يعني انتم أصحاب اكاديمية الشرطة ؟؟!!

واصحاب الشوارع.. والميادين و المحلات ..واصحاب البلد ؟؟!!

طيب .. طب انا هاخرم من التحرير لدار القضاء العالي ..

هاكل كشري واخش السيما .. مالك بقى ومالي ..؟؟!!

معايا بطاقة وخلصت الجيش .. بتسمي ده اكل عيش ؟؟!

يبقى عرفتك ..

طب عريني .. فتشني .. قطعلي هدومي وافحصني وخلصني ..!!

لا انت اول ولا اخر واحد ...

عارف ..؟؟

انا مرة القطر عدى وداسني وما موتش ...!!!!

عشق الحياة مهوش ترف ..!!

عرفت ايه معنى الشرف ..؟؟!!

جتك القرف..!!

جتك القرف!!

حمص الشام
--


يعني أنا مثلا
أبقي قاعد في البيت
بتفرج علي التمثيلية
و بقزقز لب
و بشرب حمص شام
أو بشوف الأهلي و الزمالك
في الدوري العام
أو بفتكر أنا و المدام
أيام الغرام
أو بعمل زي الناس
ما بتعمل في الحمام
يدخل عليا حد
من غير إحم و لا دستور
و يقوللي طبقا للدستور
عايزينك
طب بذمتك و دينك
ده اسمه كلام
معلش أنا بستفسر مش أكتر
علشان لما نروح
نروح و نيجي قوام
طب اشرب الحمص !

كنت فين يا على ..

كنت فين يا علي ...
أمك بتدور عليك ...
كنت باحفظ ف الحروف ...
غصب عني و ع الظروف ...
خدوا دوري فى الصفوف ...
وإنتي لسه بتسألي ..
كنت فين يا علي ...
كنت باحلم بالوظيفة ...
والحرير تحت القطيفة ..
الحياة طلعة مخيفة ....
كدبة بنت آرندلي ....
كنت فين يا علي ...
كنت بسأل إيه اللي صار ...
بره جنة .. وجوه نار ...
و عرفت إيه معني إستعمار ...
من غير مدفع ولا عسكري ...
كنت فين يا علي ....
كنت ماشي بدون بطاقة ....
لا عندي شوق ولا عندي طاقة ..
بسألك وبدون إساءة ..
إمتي تاني تنوري ....
كنت فين يا علي .......

الواد ميشو
ابني الصغير
دمه خفيف شربات
من غير ما يقصد
ياما علمني حاجات
معدش بيحب الحواديت
ولا حكايات الشاطر حسن
المهم
بيموت ف الرز بلبن
ويغرق ف البلوظه
قلتله نفسك تبقي ايه
لما تكبر ياميشو
قاللي يابابا نفسي ابقي ....
قلت له لا
دي اتلغت ياحبيب بابا
قالي خلاص
ابقي انا ال ...
قلت له ودي محجوزه
قاللي يابابا ممكن ابقي ....
قلت له ودي للناس المحظوظه
قاللي هوا بقي
يابابا عايز ابقي ...
قلت له ودي محتاجه وقت
وانا كبرت
وامك كمان ست عجوزه
قاللي خنقتني يابابا
تصدق
قلت له جننتي يا ميشو
يا ابني نقي حلم
ينفع يتحقق
قاللي يابابا
بتسالني لييه
طب قوللي انت احلم بايه
وانا اديلك شويه
رز بلبن

بتنسى يا فارس .....

بتنسى …
يا فارس ..
فلوس المدارس
و كأنك ...
ولا فاكر خالص
ولادك يا اخويا ....
بتدرس لغات ..
ده غير الباصات
وإلا الدروس ..
ها تبعت فلوس ..
بتنسى يا فارس ..
أتارى لأسامة ..
وجزمة سلامة ....
و شنطة منال
ما هم العيال
بتنسي .. يا فارس
قماش الستاير ..
و داير يا قلبى ..
في نفس الدواير ..
وبا ارجع الاقي ..
الصغير ... صغير
ونفس الشوارع ..
بتحلم تغير ...
بتنسي ..
يا فارس ....
في أول أجازة ..
نشوف الأراضي ...
في مصر الجديدة ...
يا إما المعادي ....
ها تنسي ..
يا فارس ....

شارع عبد العزيز..
--------------------
صديقي الياباني..
كان في زياره لمصر تاني..
وهو شخص ابن بلد و لذيذ..
كان فرحان أوي و احنا بنتمشى في شارع عبد العزيز..
قاللي شايف يا فريكيكو
كل ده ياباني.. كل ده ياباني
وده اللي خلاني أقوله
طول عمرك يا سيكو سيكو خايب
شوف انت تسهر و تفكر و تصدر
و أنا آخد جمارك و ضرايب..
إنت هنا في بلاد العجايب..
أمال ايه..
قاللي ليه الهيصه الكتير دي واللمه
قلت له البلد كلها في ثانوية عامه..
عندكوا مكتب تنسيق يا سيكو سيكو
قاللي بس ده مش حل يا فريكيكو
عندنا في اليابان مافيش مستحيل
قلت له و عندناف مصر بالنا طويل
وعندنا تلات اهرامات و نيل..
و مستورة و زي الفل
قاللي عندنا ف اليابان المسئول اللي يغلط..
مفيش غير الانتحار..
قلت له و عندنا ف مصر
اللي يخربها بيخرج منها
معزز مكرم من صالة كبار الزوار
ده المسامح كريم يا أخي
وبعدين..
روحنا اتغدينا كوارع ف الحسين
من ساعتها مش عارف هو فين..
ما شفتش سيكو سيكو يا حاج رضا..

خس وجزر ..

فاكر الأرنب الغضبان ..
بتاع زمان
اللي كان في كتاب المطالعة ..
لما قال أنا زهقان ..
م الخس والجزر ..
قالوا عليه كفر ..
ومرمطوه غربة وسفر
م الواحات للقلعة ..
لحد ما قال خلاص حرام
مش قادر أقول الآه ..
وكل أمه ما تقوله ..
إيه أخبار الجزر ..
يقولها يا سلام ياسلام ..
وأخبار الخس ..
الله الله ..
إيه الحلاوة دي ...
طب فاكر
القضاء ع الإقطاع وأعوانة ..
الله يرحمك بقي يامه..
قلتيلي الكتاب بيبان من عنوانه ..
طب فاكر
كامل عامل ف المصنع ..
معرفش فين المصنع ..
وكامل علي ما اسمع ..
مات غريق وهو بيحاول..
يهرب ل إيطاليا ..
فاكر تحيا الحرية ..
طب آدينا كلنا بقينا ..
أرانب ف حلة ملوخية ..
بالهنا والشفا ..
يا كابتن ..